Domenica, 19 Novembre 2017
Unitelsardegna Logo
Piattaforma didattica >>
 

OPERE - Politica e Istituzioni - Vol. I / Identità e Sottosuolo - Vol. II

Pubblicazione: 
Lunedì, 13 Novembre, 2017 - 09:38

 

In su 2009 sa Domu de imprenta "Condaghes" at pubbricau in duus volúminis  cust'arregorta de scritus de Antonello Satta. Custu líbburus merescint de essi lígius ca si faint a connosci o arremonai unu de is pentzadoris e de is studiosus prus lùcidus e de prus importu chi eus tentu in Sardigna, po tempus meda cundennau a sa chi Alberto Contu, in sa sterrida stravanada cosa sua, tzerriat "damnatio memoriae". Pentzendi de nai unus cantu fueddus asuba de Antonello Satta,  mi benit de nai chi fiat unu chi portat conca, nci biat beni e biat atesu. E, difatis, "mutatis mutandi" is scritus cosa sua, mancai coberrant unu tretu de tempus chi andat de su 1949 finas a su 1990, cartzant beni a is tempus de oi puru. Is argumentus de su I volúmini funt pretzius in  partis e setzionis, sa primu parti "Política e Istitutzionis", est pretzida in duas setzionis, sa primu s'intítulat: "Scritus políticus", e chistionat de is circulus culturalis, de is giornalis a servítziu de sa petrolchímica, de sa lota sotziali e de is ideologias políticas, de sa cultura e sa política; sa de duas setzionis: "De su regionalismu a sa chistioni natzionali sarda" chistionat de s'autonomia  e de sa crisi regionali, de su federalismu,  de s'abbisóngiu de torrai a pentzai su rapportu intra de stadu e regioni e de sa Chistioni Natzionali Sarda. Sa de duas partis puru: " Línguas, etnias, identidadi" est pretzida in duas setzionis, sa primu intítulada "Sa língua sarda cumenti a chistioni política"  fueddat de sa chistioni de sa língua sarda, de sa proposta populari po sa lei apitzus de su bilinguismu, sa lota po su bilinguismu e aici sighendu; sa de duas setzionis: "Etnias e políticas de s'Identidadi. Sa letura èst praxili e de profetu.

Candu apu detzídiu de furriai in sardu unus cantu tretus de su I volúmini (pag. 517), mi seu agatada in dificultadi, ca is chistionis funt medas e totus de importu: speru de ai sceberau beni. Apu lassau a parti sa chistioni de sa Língua Sarda ca si ndi fueddat in su segundu volúmini puru e duncas prefrexu a furriai unus cantu tretus de s'unu e de s'àteru volúmini totu imparis, po chi si ndi potzat tenni una bidea prus precisa.

De "Círculus culturalis in Sardigna" - Arrelata po unu ciclu de cunferéntzias organizau de s'assótziu "Nuova Italia" apitzus "Scola alternativa in Sardigna" - annu 1972.

Pag. 141.

Is ascurtadoris scint beni meda chi po círculu culturali, oramai, in Sardigna si bolit nai una formatzioni originali  fata de sa cuntestatzioni giovanili in is zonas agru-pastoralis de s'Ísula: calincuna cosa chi podit essi assimbillau a is grupuxeddus de is àteras cuntestatzionis po ai circau de preni su sbuidu lassau de sa política in s'interpretatzioni de sa realidadi  e de sa cultura costumada, ma chi si ndi stesiat po sa funtzioni de massa esercitata in aderéntzia a is lotas socialis de prus importu de custus úrtimus annus.

Pag.142

Candu si fueddat de círculus culturalis, in Sardigna, si fait arrelatu pruschetotu a Orgòsolo. E ddoi at in custu un'arrexoni luegus crara. Orgòsolo fait nova po nexi de su banditismu. Fait nova po s'imprenta de Continenti chi est po fintzas lómpia a su puntu de pregontai s'umperu de su gasu asfissianti po sperdi is bandidus. E fait nova po s'imprenta sarda... Ma si si fait arrelatu a Orgòsolo est po un'àtera arraxoni, fatuvatu non cumpréndia o non cunfessada: poita s'esperiéntzia de su círculu culturali de Orgòsolo tenit cumenti a presupostu un'arresúmini generali de sa realidadi sarda.

Pag.144,145.

Su círculu de Orgòsolo tenit orígini cumenti a una strutura culturali scheta, mancai de opositzioni, ma tenit su merescimentu de cumprendi in pressi chi, a fai unu trabballu de aculturatzioni scéti, currit s'arriscu de si morri cumenti a is àterus círculus. Is cosas a nai sa beridadi non andant in manera aici schemàtica ... Sa beridadi est che su círculu culturali s'agatat in is cunditzionis de depi interpretai unu ruolu cosa sua in is fainas cumplessas de is zonas internas ... Naraus, in manera schemàtica, chi su probrema de is zonas internas nascit, aroru de su 1966-67, candu, in su matessi tempus cun sa programmatzioni arregionali, si ammuntonant in términis  abbastàntzia esplosivus is cuntraditzionis de su sétiu económicu-sociali e políticu de sa Sardigna: banditismu, crisi de sa messarítzia e sa pastoria, industrializatzioni capitalística de sdorrobbu cun incentivus púbbricus, speculatzionis in is logus turísticus de sa costera, annúgius de s'eredeu apillaus, intradura de sa civilidadi de is cunsumus, arrolu de intermediatzioni capitalística de sa Regioni Autónoma. In sa crassi política su nasci de custu probrema est arriciu a trotu, cumenti cun facilidadi si podit a biri de s'arrelata de sa de 5 legisladuras de su Consillu Regionali.

Pag. 147

Seus in s'atóngiu de su 1968. Intra pagu nci funt "is cuatru dís de Orgòsolo". Su Maju francesu est giai acontéssiu e in Sardigna puru nascit su movimentu studentescu. ...Ma bieus cumenti si movit, in Sardigna, su movimentu studentescu. Is cabus e is elementus prus ativus e preparaus de s'Universidadi de Casteddu, innui acontessint is lotas prus spainadas, funt in generi de orígini urbana. No est scéti po custu datu anagràficu, epuru, o scéti po custu, chi su movimentu studentescu in Sardigna si movit pruscatotu peri línias urbanas. Ddoi at arrexonis prus fungudas chi andant torradas a portai a su raportu citadi - campàngia in s'Ísula, a sa funtzioni de is citadis in is cunfrontus de is zonas internas. Casteddu pruschetotu, no at pérdiu su caràtiri cosa sua de aposentamentu coloniali. Est duncas prus che normali, chi su movimentu studentescu casteddaju produsat una chistioni chi no arrannescit a interessai a prenu is studiantis de is zonas internas. ...

Pag. 150

In realidadi is orgolesus, in s'interis de s'ocupatzioni de sa facultadi de Leis,   agatant sa cunfirma de cantu est difícili agatai una saldadura intra de fortzas studentescas urbanas e círculus culturalis de sa campàngia. Calincunu espressat in s'assembrea  su pentzamentu chi is lotas brabaxinas si potzant furriai, in sa citadi, po is grupixeddus de pagu contu, in unu ogetu de consumu. Podit parri una brulla e diaici est pigada de s'assembrea. Medas fatus, perou, prus a tradu ammostant cantu cussu pentzamentu siat giustu. Unu regista  famau de cinema " de manca", po esémpiu, proponit a cu círculu culturali de Orgòsolo de organizai una manifestatzioni populari de protesta po dda podi filmai e ndi podi bogai una secuéntzia po unu "polpetoni" cosa sua apitzus de su banditismu sardu; e abarrat abbastànztia spantau de s'arrefudu de su círculu de annanti puru a sa promissa de un'arrecumpensa. Custu cumportamentu consumísticu est determinau de su fatu chi Orgòsolo siat stétiu su centru de su banditismu brabaxinu. Cun is lotas socialis nobas puru is grupus scoberrint  " il buon selvaggio". E ddus infrevorat  su fatu che "il buon selvaggio", in s'interis de is cuatru dís de lota, seghit cun sa línia sighida de is partidus "de manca". In realidadi custa segada non si cumprit apitzus de schematizatzionis ideológicas. In Orgòsolo non si domandant prus òperas púbbricas, non si pretendint prus finantziamentus arregionalis. Si ponit intamis su probrema de sa gestioni de bàsciu de su poderi locali e si torrat a proponni su probrema de sa terra non prus aintru de su schema "sa terra a chi dda trabballat", ma aintru  cussu de sa colletivizatzioni. Su scàndulu est mannu. Fueddat de Orgòsolo puru su "Gemingbao". "Le Monde" (14 de Donniantu 1968) donat unu reasúmini de is fatus craru meda. ...In s'imprenta sarda, intamis, torrat a bessit a campu su razismu. "La Nuova Sardegna", cun unu corsivu de un'esponenti famau de sa "democratzia" tataresa, avocat sa domadura. Is partidus de  manca circant de si insertai in s'avolotu, ma sa línia política chi proponint no agatat acunsentimentus...

Pag.154, 155.

Si podit cumprendi cumenti, a ascurtai custus argumentus in términis de giornalismu malu, e incapitat fatuvatu a s'imprenta sarda, potzat bessiri a pillu s'acusa de "separatismu" e po separatismu si depit cumprendi, a sa manera bécia, unu processu isolatzionista de genia nazionalista/regionalista. Est un'acusa frassa e strumentali ditada de sa cusciéntzia mala de chini, in Sardigna, in s'imprenta e in is partidus, at sémpiri tentu un'arrolu de intermediatzioni coloniali... In su círculu culturali de Orgòsolu funt passaus, po scàmbius de esperiéntzias, is esponentis de medas movimentus políticus stràngius, de is "Black Panters" a is sudafricanus chi lotant contras a su "apartheid", a is óminis de sa resisténtzia palestinesa. Naturalmenti s'imprenta sarda non si ndi est mancu acatada.

Pag. 156,157.

Apustis de is "cuatru dís" s'indiritzu de is círculus culturalis s'est  apuntau pruscatotu apitzus de s'aprofundamentu de is probremas de su sutasvilupu... Sa lota contras a su colonialismu, chi is círculus portant a innantis cun unu acunsentimentu populari mannu, s' articolat immui in su chi est narau "arrefudu". In su beranu de su 1969 , nc'est sa lota contras a s'istitutzioni de su Parcu de su Gennargentu e, in su stadiali, sa lota contras a s'istitutzioni de su polígonu permanenti de tiru de Pratobellu. Cun su progetu de su Parcu, chi s'iat depi spainai peri 366.000 etarus, si punnat a ferri s'economia pastorali, a isulai, tirendindeddi sa caraterística de resisténtzia de eredeu, totu sa zona de muntàngia de sa Sardigna centrali, a creai, cumenti si narat in is ciclostilaus de is círculus culturalis, una genia de reserva indiana innui, acorrai, segundu s'imàgini de unu manifestu famau de Antine Nivola, is úrtimus sardus chi non s'arressignant a una sorti de serbidoris. Su progetu balit puru cumenti a sterrida po  spainai a sa Sardigna centrali su turismu coloniali chi oramai nd'at imprenu is costeras. In prus su progetu ddu ponit a puntu sa Generalpiani chentza nisciuna consultatzioni cun is populatzionis interessadas, nimmancu po mediu de is amministratzionis comunalis. Basta un'atóbiu de massa in su cínema de Orgòsolo e un'àteru in sa pratza printzipali de Baunei po fai arrui su progetu de su Parcu. In is "sferas cumpetentis" iant cumpréndiu beni chi sa proposta, in logu de piegai s'arresisténtzia de sa muntàngia, arriscat de dda fai infeliri. Chi s'amparu de sa fàuna, de sa frora, de is bellesas naturalis fiat scéti una scusi po operatzionis de prus importu si cumprendit calincunu mesis apustis, candu a sa fàuna, a sa frora e a is  bellesas naturalis ddas cannonegiat sa Brigata Trieste chi fissat unu polígonu de tiru própiu in su territóriu destinau a su Parcu. Seus lómpius, diaici, a is fatus de Pratobellu de su Mese de Làmparas 1969, e innòi puru su círculu culturali e sa populatzioni de Orgòsolo oponint un arrefudu.

Pag.158

Candu si donat un'apretziamentu de custas lotas si fueddat fatuvatu de is límitis  de sa chi est narada "strategia de s'arrefudu".

Pag. 160, 161.

Innòi, in Sardigna, si nci podit chesciai, contras a is críticas a strintu ideológicas, chi sa strategia de s'arrefudu non est abbastàntzia spainada. De asinuncas non iant a acontessi certus fatus foras de medida, cumenti a cussu acontéssiu pagu tempus fait in Sant'Andria 'e Frius. Custa borta, finalmenti, podeus umperai su materiali chi si ofrexit "L'Unione Sarda”, mancai non tengiaus nisciuna fidúcia chi ndi potzat bessiri una campàngia de imprenta bera e própia. At intervenni s'autoridadi cumpetenti po smenguai is fatus e totu at a essi luegus scarésciu.

Scrit, duncas, sa “Unione Sarda” de su 17 de Maju 1970 asuta unu títulu a ses corúndulas "In allarmi is pastoris de su Gerrei po su diserbanti lómpiu de su Vietnam" : "su "tordon", su diserbanti prus potenti de su mundu, est stétiu portau de s'orrori de sa gherra de su sudest asiàticu a su scunfortu de is muntàngias sicas de su Gerrei. Est unu líchidu chi ndi fait arrui is follas de is matas e provocat, segundu cantu ant averiguau scrucullus fatus in Saigon e in América, cambiamentus mostruosus: candu torrant a nasci is follas funt impaperotadas, diferentis". Su fenómenu prus impressionanti - sighit su giornali - est un'àteru: su tordon agiscit asuba de s'embrioni umanu come su talidomide. ...

Pag. 165

Su círculu de Gavoi, su de Orgòsolo, su de Norghiddo, su círculu "Città-campagna" de Casteddu narant chi s'industrializatzioni de sa Sardigna centrali, cumenti dda bolint cumpriri, ammanniat su sutasvilupu de s'Ísula, intamis de ddu smenguai. In s'interis - si osservat- chi is cumplessus chi depint nasci a Otzana, totus de genia petrolchímica, faint parti de sa chi is economistas difinint "bruta". Custus cumplessus, provocant, totu una filera de alluamentus destinaus a tenni efetus asuba de s'economia agrícola e pastorali non scéti in sa Sardigna centrali, ma in sa bega aristanesa puru. Is scàrrigus de is indústrias nobas, fatus bessiri in su Tirsu, provocant un'impoberimentu, si non su acabbu, de is corturas de acuai chi in zonas mannas de s'aristanesu si serbint de cuss'àcuas. ...

Pag. 167, 168

Immui  ddoi at de si pregontai si is comunidadis de is zonas internas s'ant a furriai contras a s'industrializatzioni cun un'àteru arrefudu. Sa lota contras a su  Parcu de su Gennargentu, totu summau, est stétia abbastàntzia fàcili. Podeus nai chi s'obbietivu est arrutu a su primu corpu. Sa lota de Pratobellu puru, mancai tosta, mancai difícili est acabbada in manera positiva. Non ddoi at a ai in Pratobellu, cumenti fiat in is intentzionis, unu polígonu fissu, tant'est berus chi ocannu non si faint esercitatzionis militaris in sa zona. Po su chi pertocat s'industrializatzioni, invécias, sa lota si annunciat prus difícili. Tropu mannus funt is interessamentus in giogu. Is indústrias petrolchimicas, cun sa còmpora de is duus giornalis sardus, si funt oramai postas meri puru de s'opinioni púbbrica. In custa situatzioni a is círculus culturalis sardus benit a mali achiriri is datus económicus essentzialis po s'apretziamentu de su probrema. Abarrendi a su chi at nau de pagu Giovanni Lilliu in su Consillu Regionali, is interventus prevídius po is impiantus industrialis nous assumant in totu, po totu sa Sardigna, a 1.608 miliardus. De custus prus o mancu su 30% ddu iat depi donai, in cuntribbutus a fundu pérdiu, sa "Cassa per il Mezzogiorno"; su 18%, prus o mancu, po is infrastruturas, sa Regioni Sarda. Su chi abarrat ndi benit de préstidus agiudaus a su 4% de interessu. Custu bolit nai chi s'industrializatzioni si fait cun capitalis púbbricus, mentras is guadàngius abarrant a is aziendas. Apitzus de custus datus is círculus culturalis faint unu discursu chi si cumprendit luegus a is populatzionis de is zonas internas. Unu càlculu lestru bastat a stabbiliri chi, fadendi unu prétziu médiu de 500 mila francus a etaru, e est unu prétziu de mercau artu meda, cun 1.608 miliardus si iant podi comporai 3.216.000 étarus de terrenu, candu sa Sardigna tenit una superfici de 2.400.000 étarus, totu imparis, muntàngia, bega, aposentamentus urbanus, bias e zonas demanialis. Custu cunsideru serbit a sterri su probrema de sa terra, chi is círculus culturalis cunsiderant de fundamentu. Afrontai su probrema de sa terra, po is círculus, bolit nai afrontai cussu de s'indústria puru...

De "Documentu de su círculu "Città-campagna"

Pag. 248,

Ma is arrexonis de s'opositzioni a is manovras e a is aposentamentus de Pratobellu funt prus mannas meda e pertocant totu sa populatzioni sarda. Sa Sardigna difatis, giai de tempus est sumportendi su cambiamentu in una basi militari gigantesca italiana e stràngia. In una basi chi, siat nau intra de paréntesi, si ddoi at gherra, non at a essi amparada e at a essi sbandonada de unu totu a sa sdorrocadura cumpleta, aici cumenti at decrarau su Comandu de sa Nato. Basis militaris nascint in dónnia logu, de Casteddu a su Monte 'e Limbara, de Deximumannu a Cabu Frasca, de Teulada a su Sartu de Chirra, a Cabu Santu Larentzu. ... Is repartus nous tramudaus in Pratobellu serbint a acabbai s'ocupatzioni militari de sa Sardigna de unu cabu a s'àteru, de is costeras a s'internu. ... Nè si podit pentzai chi sa Regioni si potzat contraponni a tali regimi.  Issa difatis est oramai degradada a un'apendixi esecutiva simpli de sa política de su Guvernu centrali, a  un'aparatu grai de sutaguvernu bonu a nudda, cumenti ant ammostau is eletzionis regionalis, siat po su mecanísmu clientelari chi dda dominat, siat po is prospetivas innui si movit. ...

Pag.249

Po su chi pertocat sa Sardigna, unu regímini militari e de politzia no est àteru chi s'aina po tenni firmas is populatzionis a is cunditzionis colonialis cosa insoru. Sa línia de sa colonizatzioni capitalística prumóvia de is grupus dominantis stràngius, acotzada de is agràrius e de is "cetus" de “burghesia compradora” sarda, est cumprendusí  a ritmus lestrus e cunformas a programmas globbalis e, in su matessi tempus articolaus. Issa si cumprit cun s'industrializatzioni de sa Moratti-Esso, de sa Rovelli-Gulf, de sa Rumianca, de sa Snia-Viscosa, de sa Montedison, de sa Bastogi, de sa Fiat e cun sa destinatzioni de sa parti manna de s'Ísula a "àrea de servítziu" de su capitalismu internatzionali: servítzius económicus e servítzius militaris. Ma sa colonizatzioni capitalística cundennat s'Ísula a su sutasvilupu difinitivu, a is salàrius bàscius de is pagus operàjus ocupaus, a sa disocupatzioni e suta-ocupatzioni crónica, a su disterru fortzau, a su fàmini, a is malàdias. In particulari, sa colonizatzioni cumportat sa sperdimenta de dónnia atividadi de trabballu ancoras autónoma, ancoras no assugetada a su sfrutamentu capitalísticu. ...

In àterus fueddus cumportat sa sperdimenta de sa pastoria e de sa messarítzia in cantu atividadis de allevadoris e coltivadoris diretus, cumportat sa sperdimenta de is pastoris e de is messajus. ...

Pag. 251

Totus is populatzionis sardas, de monti e de is costeras si depint movi contras a sa violéntzia e a is atzitzamentus de su Guvernu de Roma e de is arrapresentantis sardus cosa insoru.. Si ndi depint bogai totus is basis militaris e  is trupas, italianas e stràngias, de sa Brabaxia e de totu sa Sardigna. Sa lota depit puntai deretu contras a is struturas económicu-socialis de s'Ísula.

De " Is sutaprodotus de su petróliu"  - De Il Giornale, n.29-31, Meseidas 1969 - Friaxu 1970.

Pag. 253

Mai cumenti a oi est partu  tanti craru su fallimentu de sa burghesia sarda cumenti a crassi dirigenti autónoma e avatu su fallimentu de sa Regioni cumenti a Istitutu in gradu de amparai, aintru s'ordinamentu atuali de su Stadu italianu, is interessamentus de is populatzionis sardas.

De "Sa Sardigna chi non bolit essi una colónia" - In R. Farné, "La Sardegna che non vuole essere una colonia, Jaca Book, Milano 1975.

Pag.259

Is Stadus/Regionis sutasvilupaus no ant a essi scéti produsidoris de matérias primas o de primu manifatura, ni ant a essi scéti mercaus de spainadura, ma ant torrai a bessiri sémpiri de prus logus de manodopera a costu bàsciu po prodotus fintzas a ora apariciaus in is metrópolis. Sa metrópoli, is Stadus/regionis capitalísticus svilupaus, ant a cambiai sémpiri de prus is fàbbricas cosa insoru in fàbbricas de produtzioni de livellu tennológicu artu mentras ant a spostai is setoris produtivus precedentis ( po esémpiu sa machina) in su chi tzerriaus tertzu mundu. ...

Is zonas in bia de svilupu, a su contràriu, ant a abarrai sutasvilupadas. Ant a sumportai custus aparaus produtivus nous cumenti a corpus disimbillantis, cumenti a casteddus de sarvesa luegus cambiaus in guronis infetus chi ant a pudesci totu sa vida de su Stadu/Regioni.

De "Sardigna. Unu populu in circa de s'identidadi cosa sua" In Etnia, lingua, cultura. Un dibattito aperto in Sardegna, Edes, Cagliari, 1977.

Pag. 266

In unas cantu generalizatzionis schemàticas, e ndi eus fatu esperiéntzia de pagu puru, acabbat po essi separatista (obertu, mascherau, impartziali) non scéti chi fueddat de indipendéntzia, ma  puru chi fueddat de autodeterminatzioni, de autuguvernu, de identidadi de su pópulu sardu, chi cunsidera su sardu una língua de minoria e de s'eredeu e po fintzas chi tentat una revisioni de su cuncetu de regionalismu in sa chistioni generali apitzus de s'autogestioni. …

Pag.267, 268, 272

Su probrema berus, po sa Sardigna, e non scéti po sa Sardigna, est in su fallimentu averiguau de s'autonomia regionali. … Su fallimentu de s'autonomia regionali … portat a sa rivendicatzioni de un'autoguvernu prus ampru, a su decentramentu de sa matessi Regioni, a s'abbisóngiu de torrai a disciniri s'istitutu autonomísticu, oramai chentza de una identidadi cosa sua, de unu mínimu de sustàntzia populari. … Is preguntas pressantis de autonomia chi bessint a pillu oi, non scéti a livellu regionali, ma a livellu puru de comunidadi, si no po fintzas de bixinau, ammostant chi sa cuncetzioni costumada de su Stadu oramai est fallida.  … Su probrema puru de s'identidadi de su pópulu sardu,  oramai ndi arraxonaus de annus, si podit insertai in custu processu de sfaldadura de sa cuncetzioni costumada  de su Stadu. Chi si ostinat ancoras a pentzai chi una identidadi o una natzionalidadi, po si afirmai, po si espressai, po produsi una cultura cosa sua in sa scola e in is maneras de produtzioni si depit amarolla organizai in Stadu separau, fait a biri de no si essi réndiu contu beni de is cambiamentus acontéssius in sociedadi in is úrtimus trint'annus. Firmu ancoras a una cuncetzioni otuxentesca de sa natzioni-stadu non at biu sa crisi de is grandus sistemas, chi puru est  evidenti in is “marcas de làcana” … Non s'est nimmancu réndiu contu de su decrassamentu económicu de custas terras e pentzat ancoras a“rinascitas” nobas improbbàbbilis incarreradas de su centru, candu invécias is rinascitas precedentis, non scéti non ant arresólviu nisciunu probrema, ma ant provocau impoberimentus gravis meda, económicus e de s'eredeu. Non po nudda is puntas prus artas de su disterru, in Sardigna, si funt tentas própiu cun s'atuatzioni de sa Lei 588. …

Tocat a ddu narai a craru meda chi in su sciacu mannu chi si subrastat non podeus acordai nisciuna cunfiantza a unu tertzu risorgimentu, fillu de su segundu e nebodi de su primu; non podeus acordai cunfiantza a una “continuidadi” de su stadu italianu. Invécias credeus chi po torrai a costruiri calincuna cosa, po bessiri de sa crisi, tochit finalmenti invertiri su métodu e procedi de is periferias antzisché de su centru. Seus, est a nai, po torrai a costruiri su stadu in sa manera chi naràt Lussu candu su fascismu fiant acanta de arrui: est a nai cambiai is poderis de su stadu cantu prus possíbbili a is comunudadis, po cambiai cuotas de soberania efetiva a is regionis, pruscatotu candu custas tenint, cumenti a sa Sardigna, una identidadi cosa sua, una caratirizatzioni cosa sua, de s'eredeu puru. …

Pag.274

S'aici nau segundu risorgimentu mandat luegus in Sardigna is imbiaus cosa sua: ministrus, sutasegretàrius, cabus de partidu benint in s'Ísula a pregontai tranchillidadi sociali e moderatzioni. Sa sterrida difinitiva de su Statutu speciali po sa Sardigna est fata candu restauratzioni centralista at fatu passus decisivus. S'aici nada smasciada autonomística de su 1947 in efeti cunsistit in s'inserta de su regionalismu sardu in sa vida italiana. Is partidus de sa manca afirmant sa cuncetzioni  chi narat chi s'autonomia sarda si podit svilupai scéti in sa dipendéntzia e tenit cumenti a tarea s'integratzioni cumpleta de sa Sardigna in s'Itàlia. …

Pag.275

Is partidus prus mannus respingint puru s'úrtima tenta fata de Lussu po donai a sa Sardigna un'autonomia prus manna po médiu de sterrida  de su Statutu speciali po sa Sicília. Diaici est nàscia sa Regioni smesada chi tenit oi sa Sardigna, cun una autonomia chi totus is partidus de s' arcu costitutzionali cunsiderant in dí de oi partziali e limitada. In s'arricidura e glorificatzioni de sa dipendéntzia imposta de sa restauratzioni centralista de su segundu risorgimentu  si podit agatai s'arreíxini de is probremas nostus gravis meda de oi, de sa monocoltura petrolchímica, de sa bogadura de fundu de arreíxini de is Sardus de sa terra cosa insoru, de sa béndita a stracu baratu de su territóriu cosa nosta, de sa subordinatzioni culturali cosa nosta, de sa timoria po fintzas chi si potzat fueddai in sardu. ...

Annalisa Caboni

Operadora de s’Ufíciu de Língua Sarda Província Sud Sardigna, sea de Biddacidru.