Mercoledì, 13 Dicembre 2017
Unitelsardegna Logo
Piattaforma didattica >>
 

In Macumere at a èssere ammentada “sa Batalla de Macumere” (19 de maju de s’annu 1478)

Pubblicazione: 
Lunedì, 13 Maggio, 2013 - 12:53

 

S’Amministratzione Comunale de Macumere cun s’agiudu de s’Ufìtziu Limba Sarda de sa Provìntzia de Nùgoro e cun s’agiudu de sa Biblioteca Comunale, organizat in sas dies de mèrcuris 15 e martis 21 de su mese de maju 2013, una sèrie de cunferèntzias-leturas intituladas “Sa Batalla de Macumere”. Sas cunferèntzias sunt inditadas pro sos pitzinnos de sas iscolas primàrias de Macumere de sas classes 3a, 4a, 5a de carchi classe de sa 1 de s’iscola secundària.

Sas cunferèntzias ant a durare 35 minutos e ant a èssere fatas cun s’agiudu de sas presentadas multimediales e in prus a sos iscolanos at a èssere dadu unu libreddu cun s’istòria de sa batalla chi in sa die de su 19 de maju 2013, at bidu comente protagonistas su Marchese de Aristanis Lìnardu de Alagon- Cubeddu contra de su Vitzerè de su Rennu de Sardigna Nigola de Carroz.

Su testu de su contu, bidet chistionare a manera dereta Lìnardu de Alagon- Cubeddu, chi contat comente fiat arribadu a gherrare contra de su “Vitzerè” e contat puru comente est andada sa batalla chi est istada fata in su logu numenadu “Campu Castigadu”. Unu de sos mòtivos fiat cussu de su coju chi Nigola de Carroz cheriat combinare intre de su fìgiu sou Dalmatziu e cun Liànora sa fìgia de Lìnaldu de Alagon- Cubeddu.

Ma sos mòtivos prus importantes fiant cussos chi bidiant Lìnardu comente nepode de sos Giughes d’Arbarèe chi fiat istadu “cundannadu” pro “fellonia” da su re Giuanne “su Sena Fide” pro neghe de sas fàulas e disfamadas de su Vitzerè Nigola de Carroz.

Sas cunferèntzias ant a èssere fatas dae Màriu Antìogu Sanna, Operadore de s’Ufìtziu Limba Sarda de Macumere e istòricu chi at iscritu sos testos de sos libreddos in sardu e in italianu. Sos disegnos e sas mazines de su libreddu sunt istadas fatas dae Giùliu Ledda, artista famadu chi traballat in sa Biblioteca de Macumere; su libreddu est istadu fatu dae s’ala grafica dae Anna Gemino.

Totu su traballu pro ammaniare sas cunferèntzias est istadu fatu dae su personale de sa Biblioteca Comunale ghiadu dae sa Diretora Rita Pinna. Agiudu mannu puru de sas operadoras bibliotecàrias de sa coop. Byblos.

Màriu Antìogu Sanna- Operadore Mandamentu VII. 

 

Fonte